રાષ્ટ્રીય કક્ષાના કરાટે, વુશુ અને ટેકવૉન્ડો રમતના ખેલાડીઓની ચપળતા, નમનીયતા અને વિસ્ફોટક બળનો તુલનાત્મક અભ્યાસ

Abstract

આ સંશોધન અભ્યાસનો હેતુ રાષ્ટ્રીય કક્ષાના કરાટે, વુશુ અને ટેકવોન્ડો રમતના ખેલાડીઓની ચપળતા, નમનીયતા અને વિસ્ફોટક બળનો તુલનાત્મક અભ્યાસ કરવાનો છે. આ સંશોધન અભ્યાસ માટે ગુજરાત રાજ્યના રાષ્ટ્રીય કક્ષાના કરાટે, વુશુ અને ટેકવોન્ડો રમતના કુલ 30 ખેલાડીઓ પસંદ કરવામાં આવ્યા હતા. જેમાં 10 ખેલાડીઓ કરાટે રમતના, 10 ખેલાડીઓ વુશુ રમતના અને 10 ખેલાડીઓ ટેકવૉન્ડો રમતના પસંદ કરવામાં આવ્યા હતા. આ તમામ વિષયપાત્રો 20થી 25 વર્ષની વયજૂથના માત્ર ભાઈઓને જ પસંદ કરવામાં આવ્યા હતા. અને બધા જ ખેલાડી ભાઈઓ આંતર વિશ્વવિદ્યાલય કક્ષાએ પોતપોતાની રમતમાં પસંદગી પામેલા હતા. ઉત્કલ્પનાની ચકાસણી માટે ગુજરાત રાજ્યના કરાટે, વુશુ અને ટેકવોન્ડો રમતના કુલ 30 ખેલાડીઓ પર ચપળતા, નમનીયતા અને વિસ્ફોટક બળ જેવાં પાસાના માપન માટે “E” ગુણોત્તર દ્વારા મધ્યકો વચ્ચેના તફાવતોની સાર્થકતા જોવા માટે સાર્થકતાનું ધોરણ 0.05 કક્ષાએ લેવામાં આવ્યું હતું, જેનાં પરિણામો આ પ્રમાણે જોવા મળ્યાં હતાં. રમત પ્રમાણે ચપળતા અને નમનીયતા જેવાં પાસાંમાં કરાટે રમત જૂથનો આંક ઉચ્ચકક્ષાનું પ્રદર્શન દર્શાવતો હતો, જ્યારે વિસ્ફોટક બળના પાસામાં ટેકવૉન્ડો રમત જૂથ ઉચ્ચકક્ષાનું પ્રદર્શન દર્શાવતો હતો.